القائمة الرئيسية

الصفحات

اذا تراكمت السوائل بجسمك بتعرف شو ممكن يصير

 


اذا تراكمت السوائل بجسمك بتعرف شو ممكن يصير

تورم ووذمات، يعني متل ازا انصابت الركبة بتتوذم وبتنتفخ بسبب تراكم السوائل فيها.


طيب ازا انجرح الدماغ وانصاب ممكن يصيبو وذمات

اي اكيد لانو هو نسيج متلو متل باقي أنسجة الجسم


 لهيك رح نحكي عن الوذمة_الدماغية(Cerebral edema ) ويلي بتندرج تحت عدة مسميات متل تورم الدماغ أو ارتفاع الضغط داخل الجمجمة(ICP 

فلما يصيب الجسم إصابات مختلفة فهو بدورو لازم يرد ويدافع عن نفسو ويتشكل نتيجتها وذمات 

غالبا علاجها سهل بشوي من الراحة او فينا نحط قطع تلج عالمكان المصاب او بالأدوية او نلجأ للطبيب ازا كان الوضع بحاجة لازالة هي السوائل الزايدة .

 بس ياترى علاج وذمة الدماغ بهي السهولة

هو اكتر صعوبة لانو متل مامنعرف نظام التحكم الرئيسي بالجسم هو الدماغ وهو مهم للوظائف العامة ،فإذا صار وانصاب الدماغ فالمضاعفات رح تكون خطيييرة


 بالبداية خلونا نعرف شو عم يصير لما تتراكم السوائل بالدماغ


إجت الإصابة بالدماغ هالشي سبب زيادة بالسوائل فيه  ارتفع الضغط جواتو منع الدم يروح للدماغ ( ونحنا منعرف انو الدم فيو الأوكسجين والاوكسجين ضروري لحتى يشتغل الدماغ  )نقص اكسجة للدماغ تلف الخلايا

تاني نقطة هيي:  انو الدم كمان وسيلة لحتى يخلصلي الدماغ من السوائل يلي جواتو يلي ممكن تكون ضارة الدم ماعم يروح عالدماغ صار الوضع أسوأ يمكن يأدي لموت الخلايا


تعالو نعرف شو الاسباب

أسبابها كتيرة وممكن يكون التوذم بمكان محدد او بكامل الدماغ 


 إصابات الدماغ : متل حادث سير او حادث سقوط 

السكتة الدماغية الاقفارية أشيع أنواع السكتات يلي ممكن تكون بسبب جلطة دموية او انسداد بالمخ او بالقرب منو  بهالحالة الدماغ ماعم يصلو الدم الكافي  تبدأ الخلايا بالموت


 نزيف الدماغ او السكتة الدماغية النزفية وهالنزيف يا بسبب الأدوية او إصابة بالرأس او تشوهات ولادية غير معروفة .


الالتهابات والعدوى: يلي بتسببها البكتيريا والفيروسات مثل التهاب_السحايا .


داء المقوسات: يلي بسببها طفيلي بينتقل عن طريق القطط او من الام للاجنة وينتقل للأطفال و الصغار وضعيفي المناعة


بحالة الارتفاعات العالية 

ممكن يحدث توذم  الدماغ على ارتفاع أعلى من 4900 قدم 

 وأسباب تانية متل أورام الدماغ والاستخدام غير الصحيح للأدوية او التسمم بغاز أول اوكسيد الكربون CO


اجا دور نعرف الأعراض : 


بس لازم نخبركن انو الأعراض عامة وبتختلف من شخص لشخص حسب شدة الإصابة و السبب

 والأعراض لحالها مابتكفي لتشخيص الإصابة بس ممكن تساعد كتير


الأعراض هيي: 

غثيان واقياء

صداع 

تنفس غير منتظم

دوخة

مشاكل بالذاكرة والكلام والمشي والحركة 

نوبات وفقدان للوعي 

الم بالرقبة

فقدان البصر 


للتشخيص اجرءات بيقوم فيها الطبيب المختص متل 

فحص بدني للرأس والعنق 

تصوير مقطعي CTلمعرفة مكان الوذمة 

او تصوير بالرنين المغناطيسي MRI

تحاليل للدم وفحص عصبي 


أما العلاج عم يكون :

الأدوية بتخفف من الوذمة او بتفيد بحل اي جلطات متل الوارفارين وهالشي بيعتمد على السبب والأعراض


خفض درجة حرارة الجسم

وجدو انو هالشي بساعد على الشفاء وتخفيف الوذمات بس مو دايما عم يستخدم لانو صعب انو ينعمل بشكلو الصحيح


استخدام عوامل تناضحية شو شغلتها 

قال بتفيد بسحب السوائل من الدماغ متل المانيتول او الملح عالي التركيز بتحسن من الدورة الدموية وبتقلل من الوذمات


فرط التنفس والتهوية ليش شو ممكن يفيد الأطباء ممكن يلجأو لفرط التنفس على حساب الزفير اكتر من الاستنشاق هالشي بقلل من كمية CO2 في الدم وبيجعل تدفق الدم السليم للدماغ


 والحل الأخير هو الجراحة بالحالات الشديدة، بتتضمن إزالة جزء من الجمجمة وإصلاح الضرر متل تمزق الأوعية الدموية 

أو إدخال أنبوب بلاستيكي لتصريف السوائل الزائدة وتقليل الضغط جوا الجمجمة 

وبالختام لازم نخبركن انو وذمة الدماغ حالة خطيرة ويمكن تسبب أضرار طويلة المدى للذاكرة والقدرة على التفكير

وممكن تكون قاتلة ازا تم العلاج بعد فوات الاوان  

لهيك نصيحة  لا تهمل حالك وراجع الطبيب إذا كنت مريض ضغط او قلب او إذا كان في اصابة سابقة بالعدوى او شفيت بعد حادث سيارة او سقوط وحاول لما تسافر عالمرتفعات أعطي الوقت لجسمك لحتى يتكيف مع المرتفعات

وتبقو بالف خير وصحة وعافية

تعليقات