القائمة الرئيسية

الصفحات

نصائح لاختبارات الشفوي لطبة الطب

1-  لما الممتحن يسأألك عملت ايه في النظري بلاش تقوله سبت سؤال كذا او لخبطت في كذا ..قول الحمد لله حليت كويس حتى لو كنت عجنت الدنيا في بعضها .

2- راجع اسئلة النظرى لانه ممكن يسألك تانى طيب عملت ايه فى اجابة سؤال كذا او حليته ازاى , تبقى انت مستعد للاجابه .

3- متجاوبش بسرعه لان انت لك وقت محدد فى الشفوى يبقى لو جاوبت بسرعه مش هيخليك تمشى بدرى ..وحاجه كمان لما بتجاوب بسرعه كلامك مش بيبقى واضح والممتحن هيخليك تعيد تانى الاجابه

4- للبنات بالذات : ياريت تعلى صوتك شويه علشان الممتحن مش كل شويه يخليكى تعيدى الكلام وهتنرفزيه

5- للبنات برضه : بلاش عياط ادام الممتحن ، ممكن تلاقيه متعاطف معاكى عشان بتعيطى ويهديكى بس مش معنى كده انه هيديلك الدرجه لو مش مذاكره .. يبقى لو هتنقصى درجات انقصى بكرامتك من غير عياط.

6- خليك هادى وفكر ومتوترش نفسك بشده قبل اللجنه ، الممتحن مش ماسك مسدس وهيقتلك ولا كلام من ده ، جاوب بهدوء وخليك مبتسم ...بقول مبتسم مش فاتح بؤك وبتضحك عمال على بطال.

7- اللجان اللى بتبقى فيها مجموعه مع بعضها بيمتحنوا فى نفس الوقت عند نفس الممتحن : محدش يتعدى على حق زميله او زميلته .. لما يجيلك الدور فى الاسئلة تجاوب غير كده تقعد ساكت تماما متبهدلش زميلك او زميلتك ..بلاش اسلوب وقح وانانية مع زمايلك , واللى يعمل معاكم كده بعد اللجنه ياريت تظبطوه.

8- بالنسبه للتشريح ولجنته ممكن تراجع :
Arteries and nerves : origin , end branches
Applied anatomy والحاجات اللى  فيها اعداد يعنى مثلا كام حاجه بتعدى من الفتحه دى كام حاجه ورا  الجزء الفلانى

9- حاجه اخيره : مش معنى الممتحن انه بيبتسم او بيتكلم معاك باريحية وبيهزر انه بقى صاحبك : خلى بالك ومتفتحش وتقوله اسرارك وبلاويك وتفهمه بقى انك مذاكرتش كذا ولا كذا , هتلاقيه بعدها اتحول واول سؤال هيسأله فى الحاجات اللى انت مش مذاكرها . وبصراحه فيه ممتحنين زى العسل وبتبقى لجنتهم مريحه جدا وكويسه ...ربنا يرزقكم بلجنه من اللجان الحلوه دى.



تعليقات